Tələbə Təhsil krediti haqqında

Hər bir Azərbaycan vətəndaşının təhsil almaq hüququ var. Lakin bəzi hallarda bu hüquq  hər kəs üçün əlçatan olmaya bilər. Ən əsası da aztəminatlı olan gənclərin bu problem ilə üzləşməyi qaçılmazdır.

Belə halların yaşanmaması üçün isə yeni layihələr ərsəyə gətirilir. Bu layihələrdən biri də günümüzdə aktual olan Tələbə Təhsil Kreditidir.

Bəs, təhsil krediti nədir və kimlər üçün nəzərdə tutulub? Hansı hallarda təklif olunur?

Gəlin, məsələni aydınlaşdırmağa çalışaq.

Tələbə Krediti nədir?

Tələbə Təhsil kreditləri Azərbaycan Respublikasının ali təhsil müəssisələrində və müvafiq icra hakimiyyəti orqanının müəyyən etdiyi elmi təşkilatlara təhsil haqqını və təhsil aldığı müddətdə təhsillə əlaqədar xərclərin tam ödənilməsi (yaşayış yerinin kirayəsi, yemək, tədris materialları, nəqliyyat xərcləri və s) üçün verilir

Təhsil Kreditinin növləri

Təhsil Tələbə kreditinin 2 növü vardır. Sosial və Standart.

Sosial Təhsil krediti

Sosial təhsil tələbə kreditindən yalnız sosial həssas təbəqəyə aid ailələrin üzvü olan tələbələr istifadə edə biləcəklər. Aşağıdakı tələblərə cavab verən tələbələr bu kreditdən yararlana bilərlər:

-Ünvanlı sosial yardım alan ailələrin üzvləri.

-3-cü dərəcə əlilliyi olanlar.

Hər iki valideyni aşağıdakı kateqoriyaların hər hansı birinə aid olanlar da bu kreditdən yararlana bilərlər:

-1-ci vəya 2-ci dərəcə əlilliyi olanlar.

-İşsiz kimi qeydiyyatda olanlar.

-Yaşa görə əmək pensiyası alanlar

-Yaşa görə sosial müavinət alanlar.

Standart Təhsil krediti

Sosial kredit almağa hüququ olmayan tələbələr Standart kreditdən yararlana bilərlər.

Bu kredit üçün girov və ya zaminlik tələb olunmur və bu kredit siğortalanır. Tələbə təhsil kreditini 20 il müddətində qaytara biləcək. Kredit üçün faiz az olacaq. Əlavə olaraq, yaxşı oxuyan tələbələrə güzəştlər olunacaq. Bu güzəşt həm faiz dərəcələri, həm də vəsaitin geri qaytarılmasına şamil olunur. Təhsil Tələbə krediti əcnəbi tələbələrə şamil olunmur. Məbləğ hər tədris ili üzrə ödənilir. Bank tərəfində birbaşa ali təhsil müəssəsinə ödənilir.

Qəbul imtahanında yığılan bal bu kreditin verilməsi üçün ilkin şərtlərdəndir.

Yeni qərarlara əsasən Bakalavrda 300-700 bal, Magistraturada 50-100, Subbakalavrda 110-300 bal aralığında nəticə görsədənlər ilk semestrdə təhsil krediti ala biləcək. Bu kreditlərin verilmə müddəti isə bu şəkildədir. Bakalavr 14-21 il, Magistr 12-18 il, Orta-İxtisas 12-19 il.

Tələbə Təhsil krediti almış təhsilalan həqiqi hərbi xidmətdə, analıq məzuniyyətində olduğu və müvəqqəti əmək qabiliyyətini itirdiyi (ağır xəstə olduğu) müddətdə ona kreditin ödənilməsində əlavə möhlət verilir.

Tələbə krediti üzrə faizlər hər ay ümumi təhsil krediti məbləğinin qalığından (ödənilməmiş məbləğindən) hesablanır.

Onu da qeyd edim ki, Təhsil müddətində əlaçı olmuş, təhsildə bir il itirməyən tələbələrə  müvafiq icra hakimiyyəti orqanının qərarı ilə istifadə etdiyi təhsil kreditini və ya onun bir hissəsini ödəmək öhdəliyindən azad edilir. Beynəlxalq olimpiada, müsabiqə (incəsənətə aid ixtisaslar üzrə təhsil aldıqda) və yarışlarda (idman sahəsində təhsil aldıqda) ilk üç yerdən birini qazanan, təhsil müddətində davamlı olaraq əla, ümumi uğur qazanmış, bu qanunla müəyyən edilmiş şərtlər daxilində son dərəcə istedadlı təhsilalanlara təhsil kreditləri əvəzsiz verilir.

Tələbə kreditinə müraciət və qeydiyyat üçün Təhsil Nazirliyinin rəsmi saytına daxil ola bilərsiniz.  https://edu.gov.az/

Müəllif: Səkinə Əliyeva

Linkedin hesabına keçid