Tələbə Təhsil krediti haqqında

Azərbaycan Respublikası Prezidentinin 17 iyun 2021-ci il tarixli 1367 nömrəli Fərmanı ilə AR Təhsil Nazirliyinin tabeliyində “Təhsil Tələbə Krediti Fondu” yaradılmış və Azərbaycan Respublikasının Nazirlər Kabinetinin 24 iyul 2021-ci il tarixli 226 nömrəli Qərarı ilə “Təhsil Tələbə Krediti Fondunun vəsaiti hesabına təhsil tələbə kreditlərinin verilməsi Qaydası” təsdiq edilmişdir.

Tələbə Təhsil Krediti nədir?

Tələbə Təhsil Krediti (TTK) təhsilin hamı üçün, xüsusi ilə də əhalinin aztəminatlı təbəqələrindən olan şəxslərin əlçatanlığının təmin edilməsi, təhsildə bərabər imkanların yaradılması və təhsilin əhatə dairəsinin genişləndirilməsi məqsədi ilə təşkil edilmişdir. Bu kredit dövlət dəstəyi ilə çox kiçik faizlərlə və uzun müddətə (təhsil səviyyəsindən asılı olaraq 15-22 il) verilir.

  Tələbə təhsil krediti üçün Azərbaycan Respublikasında rəsmi olaraq fəaliyyət göstərən dövlət və özəl təhsil müəssisələrində ali təhsil pilləsinin bakalavriat (əsas (baza ali) tibb təhsili) və magistratura (rezidentura), orta ixtisas təhsili pilləsində və peşə təhsili pilləsinin yüksək texniki peşə təhsili səviyyələrində, normativ təhsil müddətində əyani təhsil alan və əvvəlki semestrin nəticələri üzrə akademik borcu olmayan Azərbaycan Respublikasının vətəndaşları müraciət edə bilərlər.

Elektron Təhsil Tələbə Krediti Kalkulyatoru

Təhsil Kreditinin növləri

• Sosial (illik 2%)
• Standart (illik 6%)

 *Təhsil göstəricilərinə əsasən güzəşt hüququ əldə etdikdə 0% (faizsiz)

Sosial Təhsil krediti

Sosial TTK-dən istifadə etmək hüququna malik tələbələr:

1. Ünvanlı dövlət sosial yardımı alan ailələrin üzvləri;

 2. Orqanizmin funksiyalarının 31-60 faiz pozulmasına görə (3-cü qrup) əlilliyi olanlar;

 3. Ailə başçısını itirməyə görə əmək pensiyası alanlar;

 4. Azərbaycan Respublikasının ərazi bütövlüyü uğrunda döyüş əməliyyatlarında iştirak edərək    “Müharibə veteranı” adı almış şəxslər;

 5. Hər iki valideyni (tək valideyni olduqda isə həmin şəxs):

- orqanizmin funksiyalarının 61-100 faiz pozulmasına görə (1 və ya 2-ci qrup)əlilliyi olanlar;

- işsiz kimi rəsmi qeydiyyatlıdırsa;

 - yaşa görə əmək pensiyası alırsa;

 - yaşa görə sosial müavinət alırsa.

Qeyd: TTK-nin veriləcəyi semestrdən əvvəlki semestr (yarımil) üzrə hər hansı bir fənn (modul) üzrə akademik borc olmamalıdır.

Standart Təhsil krediti

Standart TTK-dən istifadə etmək hüququna malik tələbələr:

Sosial TTK almaq üçün müvafiq statuslara malik olmadığı təqdirdə, aşağıdakı hər iki şərti təmin edən tələbələr:

1. Birinci tədris ilinin ilk semestri üçün qəbul imtahanında toplanan balın təsdiq edilmiş minimum həddindən yuxarı bala(bax 5-ci suala), növbəti semestrlərdə isə sonuncu ÜOMG-si 71 və yuxarı bala malik olmalı;

2. İllik təhsil haqqı xərcinin ən azı 20 faizini ödəməli.

Qeyd: TTK-nin veriləcəyi semestrdən əvvəlki semestr (yarımil) üzrə hər hansı bir fənn (modul) üzrə akademik borc olmamalıdır.

Birinci tədris ilinin ilk semestri üçün tələbələrin standart TTK almaq hüququnu müəyyən edən qəbul imtahanında toplanan minimal həddi :

• Bakalavriat səviyyəsi üçün 250;

(xüsusi qabiliyyət tələb edən ixtisaslara daxil olan tələbələrə münasibətdə – 100 bal)

• Magistratura səviyyəsi üçün 50;

• Subbakalavriat səviyyəsi üçün 110.

Tələbə təhsil müəssisəsindəki həmin ixtisas üçün rəsmi qaydada təsdiq edilmiş illik təhsil haqqı məbləğinin bir semestr üçün olan miqdarında TTK ala biləcək.

TTK hansı müddətə verilir?

Bu müddət tələbənin cari təhsil səviyyəsindən, Nazirlər Kabinetinin müvafiq qərarı ilə verilən güzəşt və möhlət dövrlərindən asılıdır.

Tələbə təhsil krediti aldıqdan sonra əyani təhsil aldığı dövr, güzəşt dövrü və möhlət  müddətlərində ondan kredit geri istənilmir və faiz hesablanmır.

Təhsil müddəti bitdikdən sonra tələbəyə 2 il güzəşt verilir. Bundan sonra tələbə kreditini 10 il müddətində qaytara biləcək.

 Təhsil tələbə krediti almış təhsilalan həqiqi hərbi xidmətdə, analıq məzuniyyətində olduğu müddətdə, birinci dərəcə əlilliyi olan şəxslərə və 18 yaşınadək sağlamlıq imkanları məhdud uşağa baxdığına müddətdə ona kreditin ödənilməsində əlavə möhlət verilir.

Təhsil kreditlərində tələbələrə güzəştlər

Təhsil müddətində yaxşı oxuyan tələbələrə güzəştlər olunacaq. Bu güzəşt həm faiz dərəcələri, həm də vəsaitin geri qaytarılmasına şamil olunur.

 Kreditə görə faizlərin hesablanmasında və kreditin qaytarılmasında təhsilin nəticələrindən asılı olaraq tətbiq edilən güzəştlər tələbənin təhsil göstəricilərindən asılıdır.Belə ki:

• Sosial növdə ÜOMG-si 71, Standart növdə isə 91 bal və yuxarı olan tələbələrə həmin semestr üçün götürdüyü kreditə görə faiz hesablanmır;

• Təhsilin normativ müddətində bütün tədris semestrlərində ÜOMG-si 91 bal və yuxarı olan tələbələr aldığı Sosial TTK-nin 50 faizi, Standart TTK-nın isə 25 faizi hissəsinin geri ödənişindən azad olunur.

*Bu güzəştlər ilkin bağlanmış müqavilələrə müvafiq olaraq, semestrin və təhsil səviyyəsinin sonunda tətbiq edilir.

Təhsil tələbə krediti əcnəbi tələbələrə şamil olunmur. Məbləğ hər tədris ili üzrə ödənilir. Bank tərəfindən birbaşa  təhsil müəssəsinə ödənilir.

Bu kredit üçün girov və ya zaminlik tələb olunmur və bu kredit sığortalanır.

Tələbə kreditinə müraciət və qeydiyyat üçün Təhsil Tələbə Krediti Fondunun rəsmi saytına daxil ola bilərsiniz.  https://ttkf.edu.az/

Blog yazılarımızdan dərhal xəbərdar olmaq üçün Telegram Kanalımıza qoşulun: